Каратэші Әсел Қанай Азия ойындарының күміс жүлдегері атанды

Каратэден Қазақстан ұлттық құрамасының өкілі Әсел Қанай Айчи–Нагояда (Жапония) өтіп жатқан ХХ жазғы Азия ойындарының күміс жүлдегері атанды, деп хабарлайды KAZNUR.KZ Туризм және спорт министрлігіне сілтеме жасап.

61 келіге дейінгі салмақ дәрежесіндегі кумитэ бәсекесінің финалында қазақстандық спортшы Қытай өкілі Гун Лиге жол берді.

Ведомство мәліметінше, Гун Ли – әлемдік каратэнің ең титулды спортшыларының бірі. Ол Олимпиада ойындарының қола жүлдегері, әлем чемпионы, әлем чемпионатының күміс жүлдегері, Ханчжоудағы Азия ойындарының чемпионы және Дүниежүзілік ойындардың жеңімпазы.

Әсел Қанай финалға дейін сенімді өнер көрсетті. Ширек финалда ол Моңғолия өкілі Маралжинго Пуревжавты 9:1 есебімен жеңсе, жартылай финалда Камбоджа спортшысы Чакрия Ванннан 3:0 есебімен басым түсті.

Жапонияда иеленген күміс жүлде Әсел Қанайдың Азия ойындарындағы жеке нәтижесін жақсартты. Бұған дейін Ханчжоуда өткен Азия ойындарында қазақстандық спортшы қола жүлдеге ие болған еді. Осылайша Әсел Қанай құрлықтық додада бір саты жоғары көтерілді.

Сонымен қатар Әсел Қанай – әлем чемпионатының қола жүлдегері және Азия чемпионы.

Бұл Қазақстан құрамасының қазіргі Азия ойындарындағы каратэден кезекті жүлдесі. Бұған дейін Жоламан Биғабыл мен Софья Берульцева алтын медаль жеңіп алған болатын.

Мәтіннен қате тапсаңыз,бізге жазыңыз