Геннадий Головкиннің есімі Халықаралық бокс даңқы залына салтанатты түрде енгізілді (фото)

Геннадий Головкин Халықаралық бокс даңқы залына салтанатты түрде енгізілді. Геннадий Головкин Қазақстан тарихында алғаш рет бұл таңдаулы қауымдастықтың мүшесі атанған спортшы атанды, деп хабарлайды KAZ.NUR.KZ ҰОК-ке сілтеме жасап.

Нью-Йорк штатындағы Канастота қаласында Халықаралық бокс даңқы залына (IBHOF) қабылдау рәсімі өтті.

"Оның спорттағы орасан зор жетістіктері ресми түрде мойындалып, аңызға айналған боксшы әрі өз дәуірінің ең үздік спортшыларының бірі ретіндегі мәртебесін тағы бір мәрте бекітті. Геннадий Головкин Халықаралық бокс даңқы залына алғашқы мүмкіндіктен-ақ қабылданды. Бұл кәсіби бокс әлеміндегі ең жоғары құрметтердің бірі саналады. Енді оның есімі Мұхаммед Әли, Майк Тайсон, Флойд Мейвезер және Мэнни Пакьяо секілді бокс тарихының ұлы тұлғаларымен қатар тұр", - делінген хабарламада.

Геннадий Головкиннің бұл мәртебеге ие болуы оның бірегей спорттық көрсеткіштеріне негізделген. Әуесқой бокста ол 350 жекпе-жектің 345-інде жеңіске жеткен. Сонымен қатар ұзақ жылдар бойы Қазақстан құрамасының көшбасшысы болып, ел намысын әлемдік деңгейдегі ең ірі жарыстарда абыроймен қорғады.

Кәсіпқой боксқа ауысқаннан кейін Головкин XXI ғасырдағы орта салмақтағы үстемдік ететін чемпиондардың біріне айналды. Оның еншісінде 45 жекпе-жек пен 42 жеңіс бар. Оның 37-сі нокаутпен аяқталған. Спорттық мансабында ол WBA, WBC, IBF және IBO нұсқалары бойынша әлем чемпионы атанып, The Ring журналының беделді белбеуін иеленді. Сондай-ақ ұзақ уақыт бойы салмақ дәрежесіне қарамастан үздік боксшылардың әлемдік рейтингінде (Pound-for-Pound) көш бастады.

HBO телеарнасымен жасалған келісімшарт қазақстандық боксшыны қысқа мерзімде әлемдік бокстың басты жұлдыздарының біріне айналдырды. Оның көрерменге тартымды стилі мен жойқын соққысы әлемдік аренадағы ең танымал спортшылардың қатарына қосты. Геннадий Головкиннің жекпе-жектері тұрақты түрде миллиондаған көрерменді экран алдына жинады.

Посмотреть эту публикацию в Instagram

Публикация от Gennadiy Golovkin | GGG (@gggboxing)

Мәтіннен қате тапсаңыз, бізге жазыңыз