Жәнібек Әлімханұлының алдағы жекпе-жегін қай телеарналар көрсететіні белгілі болды

Кәсіпқой боксшы Жәнібек Әлімханұлының кубалық Эрисланди Лараға қарсы жекпе-жегін Qazaqstan және Qazsport телеарналары тікелей эфирде көрсетеді. Бұл туралы ұлттық арнаға сілтеме жасаған KAZ.NUR.KZ хабарлайды.

Qazaqstan телеарнасының мәліметінше, 7 желтоқсанда WBO және IBF тұжырымдары бойынша орта салмақтағы әлем чемпионы Жәнібек Әлімханұлы WBA тұжырымы бойынша әлем чемпионы Эрисланди Ларамен үш белбеуді сарапқа салады.

Қазақ жанкүйерлері жекпе-жекті Qazaqstan және Qazsport телеарналарының тікелей эфирінен 7 желтоқсан күні таңғы 06:00-де тамашалай алады.

Жәнібек Әлімханұлы мен кубалық боксшының жекпе-жегі АҚШ-тың Техас штатына қарайтын Сан-Антонио қаласындағы Frost Bank Center аренада өтеді.

Сондай-ақ бұл бокс кешінде кіші Ламонт Роуч пен Исаак "Питбуль" Крус арасындағы жекпе-жек өтеді.

Айта кетелік, Жәнібек Әлімханұлы Астанада өткен соңғы жекпе-жегінде Анауэль Нгамиссенгені нокаутпен жеңіп, атақтарын қорғап қалған еді.

Мәтіннен қате тапсаңыз, бізге жазыңыз