Нью-Йорктің Орталық саябағында 2028 жылдан бастап ат арбаларына тыйым салынуы мүмкін

Нью-Йорк билігі ат арбаларымен серуендеуге тыйым салатын заң жобасын қарастырып жатыр. The Straits Times басылымының жазуынша, бұл шектеу Орталық саябақтың 150 жылдық дәстүрін аяқтайды, деп хабарлады KAZ.NUR.KZ.

Мэр Зохран Мамдани мен қалалық кеңестің спикері Джули Менин құжат жобасы бойынша келісімге келді, оған дауыс беретін депутаттардың көпшілігі қолдау білдіріп үлгерген. Заң жобасын 22 қазанда қарау жоспарланып отыр, ал тыйымның өзі 2028 жылғы 1 маусымда күшіне енеді. Бұл шешім жазда болған қайғылы оқиғадан кейін қабылданды: 18 жастағы турист Романч Махаджан арбадан құлап, қайтыс болды. Осы оқиғадан кейін тексерулер мен наразылықтар толқыны басталды.

Белсенділер мен қала билігі мегаполистегі жануарлар үшін қауіпсіз емес еңбек жағдайларын алға тартып, серуендеу арбаларының жұмысын тоқтату үшін ұзақ уақыт күресіп келді. Сауалнамаларға сәйкес, тұрғындардың шамамен 68 пайызы аттракционды алып тастауды қолдады. Сонымен қатар саланың жабылуына байланысты 150-ге жуық арбакеш жұмыссыз қалады, ал иелері 180 жылқыны ұстайтын жаңа орын іздеуге мәжбүр болады.

Заң жобасы 2027 жылдың көктеміне дейін арбакештер мен ат бағушыларды қолдау бағдарламасын әзірлеуді көздейді. Бұл ретте құжат жануарларды союға немесе басқа компанияларға қайта сатуға қатаң тыйым салады. Тасымалдауға тыйым салуды бұзғандарға 10 мың доллар көлемінде айыппұл салынады.

Мәтіннен қате тапсаңыз, бізге жазыңыз