Гарри ханзада мен Меган Маркл Монтеситодағы 14 миллион долларлық зәулім үйіне қатысты шешім қабылдады

PageSix басылымының жазуынша, Сассекс герцогы мен герцогинясы Ұлыбританияға көшкеннен кейін Калифорниядағы үйін сақтап қалмақ, деп хабарлады KAZ.NUR.KZ.

Гарри ханзада мен Меган Маркл Ұлыбританияға көшуді жоспарлап отырса да, Монтеситодағы құны 14 миллион доллар тұратын зәулім үйін өз меншігінде қалдыруды ұйғарды. Page Six басылымының дереккөздеріне сүйенсек, Сассекс герцогы мен герцогинясы үйді сатылымға шығармақ емес және оны АҚШ-қа сапарлап барған кезде тұрақты америкалық резиденция ретінде пайдалануды көздеп отыр.

Бұған дейін БАҚ-та қаржылық ауыртпалық пен оны күтіп-ұстау шығындарының көптігіне байланысты жұптың Калифорниядағы жылжымайтын мүліктен бас тартуы мүмкін деген қауесеттер тараған болатын. Сарапшылардың бағалауынша, ауданы 1,6 мың шаршы метрден асатын, тоғыз жатын бөлмесі мен 16 жуынатын бөлмесі бар поместьені жыл сайын күтіп-ұстау, оның ішінде ипотекалық төлемдер, мүлік салығы және күзет қызметі жүздеген мың долларды құрайды. Алайда инсайдерлер ерлі-зайыптылардың АҚШ-пен байланысын толық үзбейтінін және Ұлыбританияға оралуды трансатлантикалық өмір салтын қалыптастыру жолындағы қадам деп санайтынын растады.

Монтеситодағы зәулім үйді жұп 2020 жылы, корольдік отбасының жоғары лауазымды мүшелері ретіндегі міндеттерінен бас тартып, АҚШ-қа көшкеннен кейін көп ұзамай сатып алған болатын. Иеліктің аумағында бассейн, теннис корты, шарап жертөлесі және балаларға арналған ойын кешені бар. Қазіргі уақытта Гарри ханзада мен Меган балаларымен бірге Ұлыбританияға көшуге дайындалуда, онда Арчи ханзада мен Лилибет ханшайым жергілікті мектепте оқуға тиіс.

Мәтіннен қате тапсаңыз, бізге жазыңыз