Шағын ауылдарда жаңа байланыс инфрақұрылымы іске қосылды

"Кселл" АҚ (Kcell және activ брендтері) Қостанай облысы Қамысты ауданының Аралкөл және Дружба ауылдарында LTE желісін іске қосты. Бұған дейін бұл елді мекендерде негізінен спутниктік арналар арқылы дауыстық байланыс қана қолжетімді болып, мобильді интернет болмаған.

Жоба цифрлық теңсіздікті азайту бойынша жұмыстардың бір бөлігі. Бұл міндетті мемлекет басшысы Қасым-Жомарт Тоқаев Қазақстан халқына Жолдауында айқындаған болатын. 2020 жылы байланыс операторлары "250+" жобасы аясында күш біріктіріп, халық саны 2025 адамнан асатын ауылдарды мобильді интернетпен қамтуға кірісті. Бүгінде байланыс желісін іске қосу үшін арнайы техникалық шешімдерді қажет ететін шалғай ауылдар үшін де бұл міндет өзекті болып қала береді.

Аралкөл мен Дружба ауылдарында радиорелелік желілер арқылы қосылған жаңа базалық станциялар салынды. Трафикті жерүсті арналары арқылы жеткізу үшін компания мамандары Раздольное ауылы арқылы өтетін жеке техникалық схеманы әзірледі. Аралкөлде жабдық қолданыстағы мұнараға орнатылса, Дружба ауылында биіктігі 30 метр болатын жаңа антенна-мұнаралық құрылым салынды.

Әрбір базалық станция үш секторлы режимде жұмыс істейді. Олар ауылдардың аумағын ғана емес, кіреберіс және шығаберіс жолдардың учаскелерін де қамтиды. Өлшеу нәтижелері бойынша мобильді интернет жылдамдығы Дружба ауылында шамамен 70 Мбит/с, ал Аралкөл ауылында шамамен 40 Мбит/с құрайды.

Аралкөл мен Дружба ауылдарының халқы аз болғанымен, заманауи байланыс қызметтеріне қолжетімділік кез келген елді мекен тұрғындары үшін маңызды. Бүгінде Қамысты ауданындағы Дружба ауылында 94 адам тұрады, мұнда жалпы білім беретін мектеп, фельдшерлік-акушерлік пункт және ауыл әкімінің аппараты жұмыс істейді. Мектепте 22 оқушы білім алып, алты педагог қызмет атқарады. Аралкөл ауылында да әкім аппараты жұмыс істейді. Қазіргі уақытта ауылда 81 адам тұрады.

Мәтіннен қате тапсаңыз, бізге жазыңыз