FlyArystan Қытайға бағытындағы рейстердің жолаушыларына маңызды өзгеріс туралы ескертті

FlyArystan Қытайға ұшып баруды және ол жақтан келуді жоспарлап отырған жолаушыларға әуежайға ертерек келуге кеңес берді. Бұл ҚХР-ға кіру және шығу ережелерінің жаңартылуына байланысты, деп хабарлайды KAZ.NUR.KZ компанияның баспасөз қызметіне сілтеме жасап.

2026 жылғы 15 қыркүйектен бастап Қытайда елге кіру және елден шығудың жаңартылған ережелері күшіне енеді. Осыған байланысты иммиграциялық бақылаудан өту кезінде құжаттарды тексеру рәсімі әдеттегіден ұзағырақ уақыт алуы мүмкін.

Әуе компаниясы Қытайға баратын немесе елден ұшып шығатын жолаушыларға сапарға қажетті құжаттардың, соның ішінде төлқұжаттың болуын және жарамдылық мерзімін алдын ала тексеріп, Қытай Халық Республикасына кіру және одан шығудың қолданыстағы талаптарымен танысу ұсынады. Сондай-ақ жолаушылар әуежайға ұшуға дейін кемінде 3 сағат бұрын келіп, бақылаудан өтуге қосымша уақыт қарастырғаны маңызды.

Әуе компания Қазақстан мен Қытай арасында визасыз режимнің қолданыста екенін еске салады. Қазақстан Республикасының азаматтары Қытай аумағында бір сапар аясында 30 күнтізбелік күнге дейін визасыз тұрақтай алады.

Мәтіннен қате тапсаңыз,бізге жазыңыз