Алматы әуежайы жүргізушілер мен жолаушыларға әуе айлағы аумағындағы маңызды өзгерісті ескертті

Алматы халықаралық әуежайы жолаушылар мен келушілерді әуежай аумағындағы көлік қозғалысын ұйымдастырудағы өзгерістер туралы хабардар етті. Майлин көшесі жағындағы негізгі кіреберіс ашылды, деп хабарлайды KAZ.NUR.KZ әуе айлағының баспасөз қызметіне сілтеме жасап.

Баспасөз қызметі өкілдерінің хабарлауынша, әуежай аркасын реконструкциялау жұмыстарының аяқталуына байланысты Майлин көшесі жағындағы негізгі кіреберіс енді екі бағытта да — кіру және шығу үшін ашық.

"Майлин көшесі жағынан вокзал маңы аумағына кіру және одан шығу үшін 11 жолақ қолжетімді: 4 жолақ — кіруге, 7 жолақ — шығуға арналған.

Сонымен қатар "Ақсұңқар" қонақ үйінің жанында орналасқан екі кіреберіс енді тек екінші қабатқа, T1 және T2 терминалдарының ұшу аймақтарына өту үшін пайдаланылады.

Жабық автотұрақ кешенін пайдаланушылар үшін Закарпатская көшесіне тікелей шығу жолы қарастырылған", - деді баспасөз қызметі өкілдері.

Әуежай жолаушылар мен қонақтарға жол бағытын жоспарлау кезінде өзгерістерді ескеріп, әуежай аумағындағы жол белгілерін басшылыққа алуды ұсынады.

Жаңартылған қозғалыс сызбасы көлік ағынын тиімдірек бөлуге және терминалдар мен әуежайдың автотұрақ инфрақұрылымына қолжетімділікті жақсартуға мүмкіндік береді.

Мәтіннен қате тапсаңыз,бізге жазыңыз