Биыл күзде Ақтаудан Стамбұлға тікелей рейс қайта орындала бастайды

FlyArystan әуекомпаниясы Ақтау – Стамбұл бағыты бойынша тікелей әуе қатынасын қалпына келтіреді. Бұл туралы KAZ.NUR.KZ әуекомпанияның баспасөз қызметіне сілтеме жасап хабарлайды.

FlyArystan әуекомпаниясының баспасөз қызметінің мәліметінше, Ақтаудан алғашқы рейс 2026 жылғы 22 қазанға белгіленген. 27 қазаннан бастап рейстер тұрақты негізде аптасына екі рет – сейсенбі және сенбі күндері орындалады.

Сейсенбі күндері рейс Ақтаудан сағат 08:40-та ұшып, Стамбұлға сағат 10:35-те келеді. Кері рейс Стамбұлдан сағат 11:40-та ұшып, Ақтауға сағат 17:05-те қонады. Сенбі күндері рейс Ақтаудан сағат 08:35-те ұшып, Стамбұлға сағат 10:30-да келеді. Кері рейс Стамбұлдан сағат 11:15-те ұшып, Ақтауға жергілікті уақыт бойынша сағат 16:40-та қонады.

Бұған дейін әуекомпания Ақтау – Ереван – Ақтау бағыты бойынша тікелей рейстердің қайта жанданатынын хабарлаған. Армения астанасына рейстер 2026 жылғы 16 желтоқсаннан бастап аптасына екі рет – сәрсенбі және жұма күндері орындалады.

Қазіргі уақытта FlyArystan әуекомпаниясының Ақтаудан ұшатын халықаралық бағыттар желісіне Кутаиси, Баку, Дубай, Батуми және Үрімші кіреді.

Мәтіннен қате тапсаңыз,бізге жазыңыз