Шарджа қаласында Қазақстанның екі азаматы қаза тапты

ҚР Сыртқы істер министрлігінің баспасөз қызметі Біріккен Араб Әмірліктерінде Қазақстанның екі азаматы қаза тапқанын растады, деп хабарлайды KAZ.NUR.KZ.

СІМ-нің баспасөз қызметі NUR.KZ тілшісіне Шарджа қаласында Қазақстанның екі азаматы қаза болғанын хабарлады. Министрлік марқұмдардың туған-туыстары мен жақындарына қайғыларына ортақтасып, көңіл айтады.

"Қазақстан Республикасының Дубай қаласындағы Бас консулдығы қажетті консулдық-құқықтық көмек көрсетуде, оның ішінде тиісті құжаттарды рәсімдеуге және Қазақстан азаматтарының қаза болу мән-жайларына қатысты Әмірліктердің құзыретті органдарымен өзара іс-қимыл жасауға жәрдемдесуде.

БАӘ-нің құзыретті органдары оқиғаның мән-жайларын анықтап жатыр. Тергеу мүддесіне байланысты қазіргі уақытта қосымша ақпарат жария етілмейді", - деп мәлімдеді ведомствоның баспасөз қызметі.

СІМ қаза болғандардың отбасыларымен тұрақты байланыста екенін және өз құзыреті шеңберінде оларға қажетті көмек көрсетіп жатқанын мәлім етті.

Мәтіннен қате тапсаңыз,бізге жазыңыз