"Көзіңнен жас ағады": ШҚО-да ер адам қараңғы үйде бес жылдан бері жалғыз тұрып жатыр

Өскеменде пробация қызметінің қызметкері Асхат Өтепов бес жылға жуық уақыт бойы қараңғы үйде тұрып жатқан 55 жастағы ер адамға көмектесті. Бұл туралы KAZ.NUR.KZ ШҚО ҚАЖД-ға сілтеме жасап хабарлайды.

Ведомствоның баспасөз қызметінің мәліметінше, Өскеменде пробация қызметінің қызметкері Асхат Өтепов 55 жастағы зағип көршісіне көмек көрсетті. Ер адам бес жылға жуық уақыт бойы жалғыз тұрып келеді. Көру қабілетінен айырылған ол анасы қайтыс болғаннан кейін қараусыз қалған.

Асхат Өтепов көршісінің жағдайын білген. Үйіне кіріп, тұрмыс жағдайын көргеннен кейін әріптестерінен көмек сұраған. Пробация қызметкерлері мен волонтерлер, олардың арасында сотталғандар да ер адамның үйіне барып, тазалық жұмыстарын жүргізді.

Волонтер Татьянаның айтуынша, үйдің ішіндегі жағдай нашар болған.

"Үйге кіру мүмкін емес еді. Дем алу мүмкін емес. Ішке кіргенде көз тұманданып, жас ағады. Өте өткір иіс болды. Мұның бәрін бір күнде өзгерту мүмкін емес екенін түсіндік", - деді Татьяна.

Оның айтуынша, үйде бірнеше жыл бойы тазалық жүргізілмеген. Көру қабілетінен айырылған ер адам күнделікті тұрмыстық жұмыстарды өздігінен атқара алмаған.

Ер адам көбіне құрғақ тамақпен күн көретінін айтқан. Азық-түлік пен қажетті заттарды таныстарының көмегімен алады. Анасы қайтыс болғаннан кейін ол жалғыз қалған. Қазір оның жанында мысығы мен иті бар.

Пробация қызметкерлері мен волонтерлер үйді тазалап, пеш пен мұржаны тазартты. Қабырғалар әктеліп, еден боялды. Пеш қыс маусымына дайындалды. Жұмыс мұнымен аяқталған жоқ. Үйді толық ретке келтіру үшін әлі де уақыт қажет.

Қазір ер адам әлеуметтік қызметкерді рәсімдеп жатыр. Оның айтуынша, маман жақын арада келіп, күнделікті тұрмыстық мәселелер бойынша көмек көрсетеді.

Айта кетерлігі, зағип адам сотталған емес және пробация қызметінің есебінде тұрмайды. Асхат Өтепов оған қызметтік міндеті бойынша емес, көршісі ретінде көмек көрсеткен.

Департаменттің ресми өкілі Салтанат Ожиканованың айтуынша, бұл оқиғаның ерекшелігі де осында.

"Асхат жанында қиын жағдайға тап болған адамның бар екенін көріп, бейжай қалмады. Бұл азамат пробация қызметінің есебінде тұрмайды, сотталған да емес. Асхаттың оған қатысты ешқандай қызметтік міндеті болған жоқ. Ол тек көмекке мұқтаж адамды көріп, қолдау көрсетуге шешім қабылдады.

Көру қабілетінен айырылған адам үшін күнделікті қарапайым әрекеттердің өзі үлкен қиындыққа айналады. Тамақ дайындау, үй жинау, азық-түлік алу, пеш жағу – мұның барлығын жалғыз орындау оңай емес.

Сондықтан бұл оқиға тұрмыстық көмек көрсетумен ғана шектелмейді. Бұл – қасыңдағы адамның жағдайын байқап, қиындыққа тап болған кезде қол ұшын созудың үлгісі. Кейде көмек көрсету үшін көп нәрсе қажет емес. Адамның жағдайын біліп, "Сізге не қажет?" деп сұраудың өзі маңызды", - деді Салтанат Ожиканова.

Қазір ер адам әлеуметтік қызметкердің көмегін күтуде. Ал пробация қызметкерлері мен волонтерлер үйді ретке келтіру жұмыстарын жалғастырады.

Мәтіннен қате тапсаңыз,бізге жазыңыз