Алматы полициясы Канье Уэсттің тыңдарманына маңызды үндеу жасады

Алматы полициясы Канье Уэсттің жанкүйеріне үндеу жасады. Полиция департаменті өкілдері Канье Уэсттің концертіне билет сатып аларда алаяқтардан қалай сақтануға болатыны жөнінде кеңес берді, деп хабарлайды KAZ.NUR.KZ.

Алматы полициясы тұрғындарға билетті тек ресми сервистерден сатып алуды ұсынады.

Сондай-ақ тәртіп сақшылары маңызды нәрсені ескертті.

"Төлемнен кейін сатып алушы ваучер алады, ол 13 тамызда автоматты түрде бірегей QR-коды бар электронды билетке ауыстырылады.

13 тамызға дейін QR-коды бар дайын билет ешкімде болмайды. Сондықтан қолдан, әлеуметтік желі мен мессенджерлер арқылы "дайын билет" сату туралы ұсыныстар алаяқтық болуы мүмкін", - дейді полиция өкілдері.

Билетті қайта сату да тек ресми тәртіппен жүзеге асырылады: бастапқы ваучердің күші жойылып, жаңа иесіне жаңа ваучер рәсімделеді.

Полиция Канье Уэсттің жанкүйеріне бейтаныс адамдарға ақша аудармауды және ақпаратты тек ұйымдастырушылардың ресми арналары арқылы тексеруді ескертті.

Мәтіннен қате тапсаңыз,бізге жазыңыз