ҰБТ-дан 120 балл алу неге грантқа кепілдік бермейді: Ғылым министрлігі түсіндірді

Ғылым және жоғары білім министрлігі 120 балл жинаған талапкерлердің грантсыз қалып, ал 100 балл жинағандардың грант иегері атануы мүмкін жағдайды түсіндірді, деп хабарлайды KAZ.NUR.KZ.

Ведомствоның ресми сайтында хабарланғандай, ҰБТ-дан жоғары балл жинау – маңызды артықшылық. Алайда грант тек жинаған балл санына байланысты автоматты түрде берілмейді.

Білім беру гранттары нақты білім беру бағдарламасы бойынша конкурс негізінде бөлінеді. Сондықтан нәтиже тек талапкердің жинаған балына емес, сонымен қатар:

• таңдалған білім беру бағытына;
• бөлінген гранттар санына;
• конкурсқа қатысушылар санына;
• конкурс деңгейіне;
• жекелеген санаттарға арналған квоталардың болуына байланысты.

"Мысалы, 120 балл жинаған талапкер жоғары бәсекелестік бар білім беру бағдарламасын таңдаса, грант санына қарағанда талапкерлер саны айтарлықтай көп болған жағдайда грант иегері болмауы мүмкін. Ал 100 балл жинаған талапкер бәсекелестігі төмен бағыт бойынша грантқа ие болуы мүмкін", - деп түсіндірді министрлік өкілдері.

Ведомствоның мәлімдеуінше, шекті балл конкурсқа қатысуға мүмкіндік береді, бірақ грант алуға кепілдік бермейді. Ал өту балы конкурстық іріктеу нәтижелері бойынша қалыптасады.

"Сондықтан білім беру бағдарламасын таңдау кезінде тек ҰБТ нәтижесін ғана емес, таңдалған білім беру бағдарламасы бойынша бөлінген гранттар санын және конкурс деңгейін де ескеру маңызды. Грант – бұл жоғары баллдың ғана емес, нақты конкурс нәтижесінің қорытындысы", - деп қосты ведомство өкілдері.

Мәтіннен қате тапсаңыз,бізге жазыңыз