АҚШ 50 ел үшін 20 мың долларға дейін визалық кепілдік енгізді: тізімде Қазақстан бар ма

АҚШ Мемлекеттік департаменті белгілі бір виза түрлерін алу үшін азаматтары 20 мың доллар көлемінде кепілдік сомасын төлеуі тиіс елдердің тізімін жариялады, деп хабарлайды KAZ.NUR.KZ.

Мемлекеттік департаменттің ақпаратына сәйкес, дүйсенбі, 3 тамыздан бастап АҚШ туристік және іскерлік визаларға өтініш берген кезде 20 мың доллар көлемінде кепілдік сомасын ала бастайды. Кепілдік сомасы АҚШ-та болу мерзімін бұзатын елдер үшін көтеріліп отыр.

"Іскерлік немесе туристік мақсатта (B-1/B-2 санаттары) елге уақытша келу үшін виза алуға өтініш берген шетелдік азаматтан иммигранттық емес мәртебесін сақтау және елден белгіленген тәртіппен шығып кету кепілдігі ретінде кепілдік сомасын енгізу талап етілуі мүмкін.

Консулдық қызметкерлері тиісті иммиграциялық емес визаларды алуға үміткерлерден виза беру шарты ретінде 20 мың долларға дейінгі кепілдік сомасын енгізуді талап ете алады – бұл консулдық қызметкерлердің өз қалауы бойынша жүзеге асады", - делінген Мемлекеттік департаменттің жаңартылған хабарламасында.

Тізімге виза алуға өтініш берген кезде кепілдік алынуы мүмкін 50 ел енген, оның ішінде 30-ы Африка елдері. Сонымен қатар тізімге Грузия, Қырғызстан, Тәжікстан, Түрікменстан сияқты елдер де кірген. Тізімде Қазақстан жоқ.

Еске сала кетейік, наурыз айында АҚШ Мемлекеттік департаменті виза алу үшін 15 мың доллар көлемінде кепілдік төлеуі тиіс елдер тізімін кеңейткен еді. Ол кезде де Қазақстан бұл тізімге енбеген еді.

Мәтіннен қате тапсаңыз,бізге жазыңыз