Шымкент базарында 11 мыңнан астам жұмыртқа айналымнан алынды

Шымкентте заңсыз импортталған тауық жұмыртқаларының ірі партиясының сатылуына тосқауыл қойылды, деп жазады Otyrar.kz.

Мамандар қала базарларының бірінен міндетті таңбалауы жоқ және ветеринариялық ілеспе құжаттарсыз сатылып жатқан жұмыртқаларды анықтады. Нәтижесінде айналымнан 11 850 дана жұмыртқа алынды.

Зертханалық сараптама өнімнің қауіпсіздік талаптары мен қолданыстағы заңнама талаптарына сәйкес келмейтінін көрсетті. Тәркіленген өнім арнайы комиссияның қатысуымен белгіленген тәртіп бойынша жойылды.

Құқық бұзушыларға қатысты әкімшілік іс қозғалып, материалдар тиісті шешім қабылдау үшін уәкілетті органдарға жолданды.

Қазақстан құс өсірушілер одағы мемлекеттік органдармен бірлесіп жұмыртқа өнімдерінің заңсыз айналымын анықтау жұмыстарын жалғастырып жатқанын мәлімдеді. Анықталған барлық заңбұзушылықтар бойынша ақпарат құзырлы мемлекеттік органдарға беріледі.

Мамандардың айтуынша, қолданыстағы шектеулерге қарамастан, еліміздің бірқатар өңірінде Ресейден әкелінген таңбаланбаған жұмыртқаларды сату фактілері кездесуде. Осыған байланысты базарлар мен сауда орындарында тексерулер тұрақты түрде жүргізіліп келеді.

Мәтіннен қате тапсаңыз, бізге жазыңыз