Бишімбаевтың анасы 1 миллион долларды қайдан алғанын түсіндіріп, сотқа көк чемодан ала келді

Астана сотында Қуандық Бишімбаевтың анасы Әлмира Нұрлыбекова "туысына беріп, қайтара алмаған 1 миллион долларды" қайдан алғанын түсіндірді, деп хабарлайды KAZ.NUR.KZ тілшісі.

Әлмира Нұрлыбекова 1993 жылдан бері кәсіпкерлікпен айналысып келе жатқанын, 2003 жылы жеке кәсіпкерлігін құрып, көтерме саудамен де айналысқанын түсіндірді. Сотта ол өзінің барлық жобасын егжей-тегжейлі айтып берді.

"Ол кезде Қызылордада азық-түлік тауарлары тапшы болатын. Біз кәмпит, мандарин, апельсиндерді тасымалдап, Қызылорда базарына жеткізіп тұрдық. Содан кейін Таразда мектеп аштым, сосын СПА аштым, содан кейін үй-жайды саттым. Ол екі қабатты үй еді, оны сатып, Әулие Ата университетін аштым, 2007 жылы осы үй-жайды миллион долларға саттым.

Шымкентке келген соң кәсіп ашып, түлектерді дайындап, шаштараз, компьютерші, аспазшы, етікшілер сынды мамандықтардың барлығын оқыттым. Содан кейін мен консалтингтік компания аштым, біз мектептер мен жекеменшік университеттерде бірнеше енгізу бағдарламасын жүргіздік. Шымкентте стоматологияның негізіне айналған химиялық препарат өндірісін аштым", - деп түсіндірді Нұрлыбекова.

Ол сондай-ақ сотқа көк чемодан ала келді. Қуандық Бишімбаевтың анасының айтуынша, ол туысына 1 миллион долларға жуық ақшаны дәл осы чемоданға салып өткізген.

Бұған дейін сотта Бишімбаевтың анасы Антикордан қорқып, туысына 1 миллион долларды бергенін және қаражатты қайтара алмай жүргенін айтқан болатын.

Мәтіннен қате тапсаңыз, бізге жазыңыз