Getty Images банкроттық рәсімі арқылы жеке компанияға айналады

Getty Images фотобанкі 2,1 миллиард доллар көлеміндегі қарызын қайта құрылымдап, банкроттық рәсімі арқылы жеке компания мәртебесіне өтетінін мәлімдеді. Бұл туралы KAZ.NUR.KZ The Straits Times-ке сілтеме жасап хабарлады.

Компания маусым айының соңында 2,1 миллиард доллардан асқан берешекті қайта құрылымдау бойынша негізгі қаржылық серіктестермен келісімге келді. Қарыз жүктемесін азайту үшін Гетти отбасы мен Koch Equity Development құрылымы фотобанкке 533 миллион долларға дейін инвестиция салады.

"Алдын ала дайындалған" банкроттық рәсімі қайта ұйымдастыру жоспарының сотқа жүгінгенге дейін инвесторлармен және кредиторлармен келісілгенін білдіреді. Компания бұл процесті жеделдетілген режимде жүргізіп, жыл соңына дейін аяқтауды жоспарлап отыр.

Getty Images өкілдері қайта құрылымдаудың ағымдағы операциялық қызметке еш әсер етпейтінін мәлімдеді. Фотобанк жұмысын іркіліссіз жалғастырады, контент авторлары, клиенттер мен серіктестер алдындағы міндеттемелерін орындайды, ал төлемдер әдеттегі тәртіппен жүзеге асырылады.

Мәтіннен қате тапсаңыз, бізге жазыңыз