Покемон карталарына қыруар қаржы жұмсаған ер адам криптовалюта ұрлады деп айыпталды

АҚШ-та 36 жастағы киберқауіпсіздік маманы Джонатан Спаллетта сот алдына келді. Ол цифрлық активтерді ұрлап, ақшаның бір бөлігін сирек кездесетін коллекциялық карталарға жұмсаған, деп жазды Gizmodo-ға сілтеме жасаған KAZ.NUR.KZ.

Алқабилер ер адамды компьютерлік алаяқтық жасап, ақшаны жылыстату дерегі бойынша кінәлі деп таныды. 2021 жылдың сәуірінде ол Uranium Finance криптоплатформасының кодындағы осал тұстарды пайдаланып, хакерлік шабуыл жасаған. Бірінші рет ол шамамен 1,4 миллион доллар, ал екінші рет 53,3 миллион доллардан астам қаржыны иемденген. Ауқымды ұрлық салдарынан сервис жұмысын толық тоқтатуға мәжбүр болды.

Сотталушы ұрланған қаражатты күрделі транзакциялар тізбегі арқылы заңдастырып, кейін миллиондаған долларды сирек заттарға жұмсаған. Ол сатып алған заттардың арасында Magic: The Gathering ойынынан 500 мың доллар тұратын өте сирек Black Lotus картасы, 750 мың доллар тұратын Pokémon карталарының жабық жиынтығы және 601 мың доллар тұратын ежелгі рим монетасы бар. Сондай-ақ ол ағайынды Райттардың алғашқы ұшағының матасынан бір бөлігін сатып алған.

Тергеу барысында құқық қорғау органдары Спаллеттадан шамамен 31 миллион доллар тұратын қалған криптовалютаны тәркіледі. Алаяқтық және ақшаны жылыстату бойынша тағылған айыптардың жиынтығы бойынша ер адамды 30 жылға дейін бас бостандығынан айыру жазасы күтіп тұр. Сот түпкілікті үкімді келесі жылы шығарады.

Мәтіннен қате тапсаңыз, бізге жазыңыз