Ғалымдар: Әрбір он бесінші үй мысығынан қауіпті паразит табылып жатады

Ғалымдар үй мысықтарының шамамен 6,5 пайызы лямблияны жұқтыратынын анықтады. Бұл – жануарлар мен адамдарда ішек жолдарының бұзылуын тудыратын микроскопиялық паразит, деп жазды Gizmodo-ға сілтеме жасаған KAZ.NUR.KZ.

PLOS One ғылыми журналында жарияланған зерттеу ондаған мың үй жануарының ветеринарлық деректерін талдауға негізделген. Giardia паразиті асқазан-ішек жолдарын зақымдап, диареяны, ағзаның сусыздануын және салмақ жоғалтуды тудырады. Сонымен қатар инфекция жұқтырған мысықтардың көбінде ауру белгілері байқалмайды, сол себепті иелері жасырын қауіптен бейхабар қалады.

Зерттеу авторы Энн Киммерлейн барлық үй жануары инфекция жұқтыруы мүмкін екенін атап өтті. Бұл тек далада жүретін мысықтарға ғана емес, пәтерден мүлдем шықпайтын жануарларға да қатысты. Паразиттер үйге көше аяқ киімінің табанымен, су құбырының суымен немесе ластанған заттар арқылы оңай енеді.

Мамандар ветеринарға жүйелі түрде қаралудың және нәжіске зертханалық талдау жасаудың маңыздылығын еске салды. Үй жануарлары мен отбасы мүшелерін қорғау үшін дәрігерлер гигиенаның қарапайым ережелерін сақтауға кеңес береді: мысық дәретханасымен жанасқаннан кейін қолды мұқият жуу, толтырғышты уақытында ауыстыру және су мен тамақ ішетін ыдыстардың тазалығын қадағалау қажет.

Мәтіннен қате тапсаңыз, бізге жазыңыз