Сусын өндіруші Бигфуттың бар екеніне нақты дәлел тапқан адамға 1 млн доллар бермек

Америкалық сусын бренді Бигфуттың бар екеніне нақты дәлелдер ұсынған адамға 1 миллион доллар көлемінде жүлде тағайындап, байқаудың басталғанын жариялады, деп хабарлады NDTV-ге сілтеме жасаған KAZ.NUR.KZ.

Алкогольдік ішімдіктер бренді Bigfoot Bounty деп аталатын ерекше акцияны іске қосты. Компания Бигфуттың (солтүстік америкалық қар адамы) бар екеніне даусыз дәлелдер ұсына алатын адамға бір миллион доллар көлемінде ақшалай сыйақы төлеуге уәде берді. Байқауға қатысу үшін 21 жастан асқан тұлғалар 30 қарашаға дейін арнайы сайт арқылы өтінім бере алады.

Байқау шарттарына сәйкес, ұсынылатын материалдарға өте қатаң талаптар қойылған. Қатысушылар бекітілген жеті критерийдің кемінде төртеуі бойынша дәлелдеме ұсынуға тиіс. Олардың қатарында ұзындығы 37-ден 38,5 дюймге дейін жететін, қиыршық тасқа алты дюйм тереңдікте басылған із, 13 дюймдік қол ізі, сағатына 20-25 миль жылдамдықпен қозғалатын, бойы 7 футтан асатын тіршілік иесінің тепловизорлық түсірілімі, ДНҚ маркерлері белгісіз шаш үлгілері, аудиожазбалар немесе криптид түскен "фотобомба" суреті бар.

Өтінімдерді бағалау үшін компания Expedition Bigfoot жобасымен танымал зерттеуші Брайс Джонсонды тартты. Брендтің аға директоры Эрика Тейлор күз мезгілінде ормандардағы беймәлім силуэттер туралы әңгімелердің жиілейтінін атап өтті. Егер бас жүлде иегері анықталмаса, ұйымдастырушылар дәлелдері ең шынайы көрінген өтінімдердің 100 авторына компания сусындарының бір бумасының құнына тең ақшалай өтемақы төлейді.

Мәтіннен қате тапсаңыз,бізге жазыңыз