2035 жылға қарай АҚШ-тағы дата-орталықтар газ тұтынудан бірден Германия мен Жапонияны басып озуы мүмкін

TechCrunch басылымының жазуынша, BloombergNEF сарапшылары жасанды интеллект технологияларының қарқынды дамуына байланысты АҚШ-та табиғи газға деген сұраныстың күрт өсетінін болжап отыр, деп хабарлады KAZ.NUR.KZ.

2035 жылға қарай АҚШ-тағы дата-орталықтар табиғи газды тұтыну көлемі бойынша әлемнің көптеген елінен озып, тек Қытай, Ресей, Иран және АҚШ-тың өзінен кейінгі орынға жайғасуы мүмкін. BloombergNEF зерттеу компаниясының жаңа есебіне сәйкес, серверлік қуаттарға қызмет көрсететін электр станцияларының газға деген сұранысы алдағы он жыл ішінде тәулігіне 15 миллиард текше футқа артады. Бұл сарапшылардың бұған дейінгі 6,9 миллиард текше футтық болжамынан екі есе көп.

Энергетикалық жүйеге түсетін салмақтың күрт артуының басты себебі – жасанды интеллектінің инфрақұрылымдық қажеттіліктері. Мамандардың есебінше, газ электр станциялары ұлттық желіге қосылатын жаңа деректер орталықтарына қажетті энергияның 69%-ға дейінгі бөлігін қамтамасыз етеді. АҚШ-та табиғи газдың қолжетімділігі, оның арзандығы және өндіріс қуатын жылдам реттеу мүмкіндігі қазба отынын серверлерді тәулік бойы қуаттандыру үшін ең тиімді көзіне айналдырып отыр.

BloombergNEF сарапшысы Генри Итон энергетика секторы 2035 жылға дейін АҚШ-тағы газға деген сұраныстың өсуіне ықпал ететін екінші ірі драйверге айналатынын атап өтті. IT-алпауыттары тарапынан отынға деген қажеттіліктің жедел өсуі қазірдің өзінде америкалық өндіруші компаниялар алдына газ өндіру көлемін қосымша арттыру бойынша күрделі міндеттер қойып отыр.

Мәтіннен қате тапсаңыз,бізге жазыңыз