ChatGPT қолданған заңгер ойдан шығарылған куәгерлердің жалған айғақтарын келтіргені үшін жазаланды

ArsTechnica басылымының жазуынша, заңгер Стивен Ааронс апелляциялық шағым дайындау кезінде нейрожеліні пайдаланып, құжатқа өмірде жоқ офицерлер мен куәгерлердің ойдан шығарылған айғақтарын енгізген, деп хабарлады KAZ.NUR.KZ.

Нью-Мексико штатының Жоғарғы соты ChatGPT нейрожелісі арқылы жасалған жалған айғақтары бар апелляциялық шағым берген адвокат Стивен Ааронсты сотты сыйламағаны үшін кінәлі деп танып, оған 5000 доллар көлемінде айыппұл салды. Санта-Фе қаласынан шыққан 40 жылдық тәжірибесі бар заңгер өз серіктесі Ширин Аль-Джибуриді өлтіргені үшін өмір бойына бас бостандығынан айырылған Оскар Рене Сандовальдің мүддесін қорғаған.

Сот шешіміне сәйкес, Ааронс сот процесінің стенограммасын ChatGPT-ге жүктеп, материалдардың сапалы қысқаша мазмұнын алуды көздеген. Салдарынан апелляциялық құжатта Мишель Амарильо мен Санчес есімді өмірде жоқ офицерлердің толықтай ойдан шығарылған айғақтары, сондай-ақ Манал Аль-Джибури, Тереза Маркес, Дэнни және Линда Стентон есімді тұлғалардың жалған куәліктері енген. Мәтінде нақты істе болмаған ойдан шығарылған қауіптер мен оқ атқан адамның киім үлгісі туралы мәліметтер сипатталған.

Ааронс құжатқа қол қойып, оны сотқа ұсынғанға дейін фактілер мен сілтемелерді тексермегенін, сондай-ақ клиентін қателіктер туралы хабардар етпегенін мойындады. Сот заңгердің өкініш білдірмегенін атап өтіп, материалдарды одан әрі тергеу үшін тәртіптік комиссияға жолдады. Адвокаттың өзі бұл қателікті байқаусызда жасағанын және жасанды интеллектінің "галлюцинацияға" бейім екенін түсінбегенін мәлімдеп, әріптестерін мұндай технологиялармен жұмыс істегенде сақ болуға шақырды. Апелляциялық істі жүргізу қоғамдық қорғаушы Ким Чавес Кукке тапсырылды.

Мәтіннен қате тапсаңыз,бізге жазыңыз